Entry Rabearivelo: Fo mitohy
Part of speech   name (poem title)
Author   Rabearivelo Jean-Joseph
  
Toa lisy maina, toa raozy malazo,
Misento fa ory sy manina anao,
Mariry tsy fantatra. Angaha voninkazo?
Asa, tsy fantatra hatramin'izao.

Miofo ny loko, malazo ny taho,
Toa zary bozaka, tsy lisy intsony.
Tsy hehy na tsiky fa feo mitalaho,
Toa rivo-baratra tsy mba mitony

Miova ho fatana izany masoandro,
Ny rivotra koa manjary mamono:
Izany no fiainana maizina antoandro
Manolo-poizina izay mila ronono
Ny lira madinika, mozikan'Edena:
Izany tsy re, izany tsy misy;
Tsaroana fa singany irery ny tena,
Tsaroana fa bozaka ilay tsy mba lisy.

Ry vorona ery! Ry rivo-mandalo!
Andeha mba ilazao ilay tiana sy tia
Fa ketraka hoe ka tena mimalo
Ilay tsy eo anilany lavitra aty.
Vocabulary  
Tables and plates   All the titles

Updated on 2017/06/21