Entry Ny foko nanidina
Part of speech   name (poem title)
Author   Rabearivelo Jean-Joseph
  
Ny foko nanidina ambony dia ambony,
ary saika hisetra izay faran'ny avo,
kanefa voadona, ka tsy afaka intsony-
naratra ny elany - ka indro izy lavo!

Naniry hihoatra anao, ry masoandro
mazava! Naniry tsy nijanona akory
na toa dia mandroso ho hariva aza ny andro:
ny alina tamy ary koa sorisory!

Koa aizina anio re no sisa mamonto,
aizi-mitambatra sy mivangongo...
Rotsiako mangina ny foko efa donto,
ary safosafoiko ny masoko bongo!

A! toa efa hionona izany alahelo...
Sy hafeniko mba hijanona angaha?
O tsia! fa ny sentoko mamelovelo,
ary izaho tsy mandre afa-tsy fofon-dra!
Vocabulary  
Tables and plates   All the titles

Updated on 2016/08/22